عشّاق الحُرّيي

       قام مارون بَكير، مع الفجر، ومش مصدِّق إنو صار عندو بيت. وكحّل عيونو بتطليعا حنوني ع وجوه بناتو التلاتي وولادو الصبيان الستّي، وترك مرتو وأمو نايمين وقعد ع السطيحا يكتب مكتوب لخيو حنّا الباقي بسوريّا: يا حنّا، أنا خيك مارون بدّي ياك تلحقني ع جبل الحريي. نحنا خلقنا تَ نعيش إيماننا أحرار، وهالجبل انخلق تَ ينصلب عليه الابريا والابطال ويخلّصو الشرق متل ما انصلب المسيح ع خشبي وخلّص العالم.

        رح دلك ع الطريق لبتوصلَك ع جبل العاقورا: بتترك سهول أفاميا، وبتمشي عكس مجرى نهر العاصي. أول نهار بترتاحو بجوار حمص، بتسأل عن ناسك إسمو سمعان. بيسهر عليك وبيطمّنك عَ الاتجاه الصحيح... مشي بالليل ع البرود ورتاح بالنهار، شمس السهل بتقتل الولاد. وبعد 4 ايام بتوصل ع منبع العاصي باللحف الشرقي لجبل العاقوره. هونيك في تجمّع نساك بيرافقوك تَ توصل لعنّا.

يمكن تهتم كيف بدك تلاقي بدل بيتك وارزاقك. تأكّد وقول للكل: اللي بيترك بيت السهل، بيلاقي بدلو، هون، ميّي.

       لو بتعرف طريقتنا بالشغل؟ ما في شغلي منقدر نعملا كلنا سوا ومنترك واحد لوحدو يشقى كل حياتو تَ يحقّقا.

       أنا أول ما وصلت تجمّعو كل اللي سبقوني واستقبلوني وطعموني وصلّينا سوا ونيّمونا ببيوتن. وتاني يوم تجمّعنا أكتر من مية شخص، الزغار يزقُّو مَيّ، النسوان يجمعو البحص والخشب، والرجال: ناس تقصّب حجار، رهبان تعمّر وناس تركّب بواب وبظرف أسبوع كنّا قاعدين ببيت من صخر لبنان ومن خشب سنديانو، قدّامو سطيحا وداير مندار حواض زهور، وتحت السطيحا قبو للمواشي، وكل بيت قدّامو كَرْمْ وجناين خضرا وفواكي.

       هون إذا ما تعاونّا سوا بتغلبنا الطبيعا وبنموت من الجوع والبرد والتشرّد... ع قمة هالجبل بالشتي، تنين بس فين يوصلو: الوحوش البريّي وعشّاق الحريّي. هو التلج بيصير جبال فوق هالجبال. هون منعيش ميّات السنين بعاد عن سلاطين الأرض والطمع.

       الحقد ضعيف كتير بيزحف زحف بالسهول. وحدا المحبي بتطير ع روس الجبال.

        خيفان بالتلج تموت من الريح والبرد؟ يمكن أجمل أيام السني يكونوا 3 أشهر الشتويي. ليلي منصلّي ببيت وليلي منتعشى ببيت وليلي منغنّي ومنخبّر خبار ببيت. بحياتنا ما عشنا الأمل والفرح متل بهالجبال. بحياتنا ما متنا قديسين وأبطال متل بهالجبال!

       وما إجا حَنّا وحدو، كتار معو من المضطهدين بسوريا تركو السهول الغنيّي وتجمّعوا بهالجبل القاسي، وكل أمَلُنْ إتّحادُنْ مع بعضن ومحبّتُنْ وعَمَلُنْ المشترك اللي خلاّهم يعمّروا أجمل بلد بالعالم!

 الدكتور أندريه كحاله

منشورات هيئة الثقافة السريانية