الاخلاق والمبادئ طلعت فوتوشوب

- تم نشر فيديو بعنوان ( اغتصاب مسيحية ) وللاسف انا حزنت جدا مش عشان المشاهد اللى جوه الفيديو لكن عشان تعليقات الناس ... فيه ناس قالت ان الفيديو قديم وبلاش تعملوا فتنة ... طبعا لو مراتك او اختك اللى فى الفيديو مكنتش هتقول كده ... المهم ان فيه اغتصاب حصل والغريب ان الاغتصاب كان فى النهار وقدام الناس ... وكمان محدش اتحرك من الناس ودافع عن السيدات اللى بيتعرضوا للاغتصاب .

- بالنسبة للناس اللى بتقول ان الفيديو قديم ... هو الناس اللى فى الفيديو اتقدموا للمحاكمة ... طبعا الرد هيكون لا ... بس الفيديو قديم ... كل همهم ان الفيديو قديم .. ياريت تتخيل لو مراتك او اختك اللى فى فيديو الاغتصاب ... طبعا كنت هتولع الدنيا ومكنتش هتسيب حقك .. للاسف كل ما تحصل حادثة الاقى الناس تقول انها فتنة ... مفيش علاج ... لكن فيه مسكنات .. واضح ان الشعب فى مصر مهتم بمنظره قدام العالم انه شعب عنده الاخلاق والمبادئ ومش عاوز العالم يشوف الفضايح ..

- ممكن تلاقى محجبة ماشية فى الشارع وشاب بيحاول يلمسها قدام الناس ومحدش يتكلم او يقول حاجة . والبنات اللى بشعرها بياخدوا تعليقات قذرة من الشباب وكمان بيتم لمسهم والناس شايفة اللى بيحصل ومحدش بيقول حاجة وساعة لما البنت تهزق الشاب تلاقى الناس يقولوا ليها انت غلطانة ... يعنى فى كل الاحوال الشاب برئ ... وطبعا الشاب يمشى ويكرر الموضوع ده كل يوم لان مفيش عقاب .

- فيه بنت بتقول لو انا ماشية فى الشارع ولقيت مجموعة من الشباب فى ناحية وكلاب فى ناحية تانية ... انا همشى ناحية الكلاب ومش همشى ناحية الشباب لان هخاف على نفسى منهم لان الكلاب اكتر امان منهم .

- الاخلاق والمبادئ فى مصر طلعت فوتوشوب وكله بان على حقيقته ومحدش يضحك على نفسه ويقول العكس .