القصة الحقيقية لفبركة شعارات حملة عون الانتخابية

جمع النائب ميشال عون بناته الثلاث في جلسة عائلية سياسية حميمة عملية جدية مصيرية انتخابية برتقالية أورنجية ما فيها:

لا مزح، ولا هزار، ولا طق حنك ولا حتى سؤال يطرح على القائد الجنرال، وانما التنفيذ دون اعتراض أو نقاش او جدال. قائلا:

يا بناتي ويا حبيباتي!

هيدول سِنِّةْ لبنان ضيعوا علي كرسي الرئاسة، وقرفوني حياتي، وحرموني قصر بعبدا، ودمروا كل طموحاتي.

وزعيمهم سعد الحريري جبلي الكوابيس في أحلامي، وطير حليفي السني عمر كرامي، وحط ايدو بئيد أخصامي: البطرك صفير والجميل وجعجع وجنبلاط، وانتخبو للرئاسة ميشال سليمان على العمياني، وانا طِلْعت سلتي فاضي، وطْلِعْت زميط يا بناتي، وزحطونوا في الدوحة زحيط من دون زيت على البلاط.

والأنكي في هل المشكل، انو كل سِنِي بيطلعولنا بمناسبة 14 شباط، ليفرجو شعبيتهن ويهزوا معنوياتي، وعملولنا من رفيق الحريري شي قديس ومشهد، وكأنو ما حدا غيرو استشهد، ونحن ما عنا قديس إلا ابو هادي الإيراني. ومنشان هيك حطينا صورتو بالمسبحة حد صورة العدره والقديس شربل اللبناني. 

يا بناتي ويا زهراتي!

الله ما بعتلي ولاد ليساعدوني بحملة انتخاباتي، وما فيني اتكل ع الجلابيط، لانهن هيدولي مطيعين، بس عينهن حمرة ع مصرياتي.

وبدي منكن يا ابناتي، كل وحدي تاخد عني شوية من مسؤولياتي!

انت يا ميراي! مسؤوليتك مطبخية تموينية وهي تحضير المناقيش لشباب التيار، وما تنسي النمورة والأهوي والشاي.

ومنشان نحمس الشباب والصبايا شوي، بدي منك تعزفيلن يا ميراي كم عزفي حلوي ع الناي!

وانتِ يا شانتال يا أحلى مودال، مسؤوليتك مادية وجمع أموال، لانو ثقتي فيك كبيرة ما بتهزا الجبال، متل ثقتي بجوزك جبران المتنصت  الفعال. ومنشان هيك بدي اياكي تتحجبي وتلبسي الشادور الايراني وتتسللي ع الضاحية عبكره بكير في الصباح، منشان ما حدا يشوفك وتصير فضيحة وقيل وقال، وتقابلي عمو حسن نصر الله في المخبأ تحت الاطلال، وتقوليلوا بيسلم عليك الجنرال وبدو منك في الحال حسب وثيقة التفاهم في كنيسة الشياح، كم شوال من المال الحلال، لأنو النجاح بالانتخابات بدو فت مال.

وانت يا كلودين مسؤوليتك مهمة جدا وهي تعبوية ثقافية فكرية ثورية عونية إلهية شعاراتية من شان نحرك الملايين من الجماهير الشعبية وتنتصر ثورتنا الإصلاحية على فساد الحريرية!

ومنشان هيك بدي منك يا أحلى الحلوين، تحضير لائحة ذكية بشعارات الحملة الانتخابية، وتكون خارق حارق لتجييش الشارع المسيحيي وزعزعة الطائفة السنية.

المهم يا كلودين تضربي بشعاراتك بيت الحريري لتريحيني من هيدول المتعبين وأعرف نام بهدوء بسريري.

ويا كلودين يا كلودين اذا عملتي شعارات حلوين الك بوسة من البابا على الخدين وطْلِبي مني عين بعطيك التنتين.

جلست كلودين سمعا وطاعةً على طاولة السفرة، وبيدها قلم وورقة ومية فكرة وفكرة، وابتكرت الشعارات الحقيقية التالية لحملة عون الانتخابية التي ستعمم كنموذج للشعارات التي سيستخدمها "التيار الوطني الحر"في خطاباته التحريضة.
 وفي ما يأتي نموذج من هذه الشعارات كما وزعاتها كلودين ميشال عون :
رجاع على وطنك باسم الحرية .. وبيعو بثمن بخس للأنظمة القمعية

رجاع على بلدك بشعار السيادي .. وسلم قرارو لكل الأعادي

رجاع على لبنان .. تحت يافطة الاسئلال .. وانقلب عليه متل المحتال .. ليضل تابع لسوريا وإيران .. ومزرعة مستباحة وساحة نزال

ارفع علم البلاد في العالي .. واركع لأهل الاستبداد والملالي
عَلِّمْ ولادك عا حمل السلاح .. منشان لبنان بحياتو ما يرتاح
حط أيدك بإيد الإرهاب .. منشان تنتصر شريعة الغاب
حَمِّلْ زلمك مسدسات .. ليفرضو عا الشعب الخوات

ساعد في انتشار المربعات .. خدمه لحزب الله بالذات

حافظ على سلاح حزب الله .. منشان تقبض من نصر الله

إذا جعت روح اسروق .. إذا فت من الباب بيطلعك حسن من الشباك
مش غلط تغش الناس .. لتنجح في الانتخابات
مش خطيي تشلّح الحرامي .. منشان تعيش معو في دولة الصرامي
مش عيب تكذب ع الشعب .. بعد ما ترجع من فرنسا الغرب
مش مهم تحرك النعرات الطائفية .. المهم تقعد عل الكرسي النيابية
استعمل كل الأساليب .. لأنك انت ملك العيب
انزل لتحت الزنار .. هيدا هوي مستواك يا ختيار
هيدا مكانك الوحيد .. لتفكر بأخذ التار
وقبل ما تحط الورقه بالصندوق .. بيع ضميرك للبندوق
شوف شو عمل باهلك .. تركهن في سجون بشار ودانك
شوف شو عمل بوطنك .. التحرير والالغاء وبحرب تموز خانك
وتصور شو رح يعمل بولادك .. تهجير وفقر وتعتير وحروب ومهالك
بيقبض من إيران .. ليسلمها لبنان

يا جنرال الكذب والحقد والنفاق والبهتان!

مهلك مهلك فالناس ليست عميان

ويوم الانتخاب يكرم المرء أو يهان

وكما ستزرع ستحصد ولو بعد آن

والشعب اللبناني أكتر من فهمان

وسيرد الصاع صاعين لشعارات كلودين